Greinar um tónlist, viðtöl og sjónvarpsþættir
Heimsóknir
89614

Höfundaréttur © Guðmundur Emilsson. Allur réttur áskilinn samkvæmt Bernarsáttmálanum, með viðaukum.
Menntastofnunum er heimilt að nota þessa síðu sé eigenda höfundarréttar getið.

Fimmta boðorðið

(16.09.2015)

Emil Björnsson 1915-1976

f. 21. september 1915, d. 17. júní 1991

emil

Aldarminning 21. september 2015

Emils verður minnst í Kirkju Óháða Safnaðarins sunnudaginn 27.september kl 14:00

 

Sr. Emil Björnsson, fyrrverandi dagskrárstjóri frétta- og fræðsludeildar Sjónvarpsins og prestur Óháða safnaðarins, lést á Borgarspítalanum mánudaginn 17. júní, á 76. aldursári. Emil fæddist 21. september 1915 á Felli í Breiðdal, S-Múlasýslu. Foreldrar hans voru Árni Björn Guðmundsson bóndi þar og kona hans Guðlaug H. Þorgrímsdóttir ljósmóðir.


Emil lauk stúdentsprófi frá Menntaskólanum á Akureyri 1939. Hann stundaði nám í viðskiptadeild Háskóla íslands 1939-41, og lauk guðfræðiprófi við skólann 1946. Hann dvaldist í Finnlandi við nám sumarið 1953, og við nám og störf í London og Canterbury 1960-61. Hann fór í námsdvöl hjá sjónvarpsstöðvum í Bandaríkjunum 1965.


Emil var ræðuskrifari í Alþingi 1941-50, fréttamaður hjá Ríkisútvarpinu 1944-65 og jafnframt oft settur fréttastjóri og fastur staðgengill fréttastjóra síðustu árin og vann að undirbúningi sjónvarps fyrsta árið þar. Hann var dagskrárstjóri frétta- og fræðsludeildar Sjónvarpsins frá upphafi þess 1965 til ársins 1985 er hann lét af störfum fyrir aldurs sakir. Emil var prestur Óháða safnaðarins í 34 ár, eða allt frá stofnun safnaðarins árið 1950. Hann var aðalhvatamaður að kirkjubyggingu safnaðarins, og var formaður kirkjubyggingarnefndar og framkvæmdastjóri byggingarinnar 1956-59 en það ár var kirkjan vígð. Hann var formaður Blaðamannafélags Íslands 1965-66. Ýmis rit liggja eftir Emil, en eftir að hann hætti störfum hjá Sjónvarpinu ritaði hann meðal annars sögu Óháða safnaðarins og eigin æviminningar. Emil lætur eftir sig eiginkonu, Álfheiði Guðmundsdóttur, og fjögur börn.

Sjá minningagreinar um Emil Björnsson