Hlegið á Melaheiði

og um

Víða veröld

(11. júlí 2015)

Þorkell Sigurbjörnsson

Virðulegir nemendur LHÍ, hámenntaðir, sem njóta leiðsagnar Hróðmars I. Sigurbjörnssonar tónskálds, komu í heimsókn fyrr í sumar. Þeir vildu fyrst vita allt um Þorkel Sigurbjörnsson. Svo snéru þeir aftur - en höfðu nú áhuga á Jóni Nordal. Viðtöl þessi hin endalausu og fyrirvaralausu tóku þeir Steinar Logi Helgason (SLH), Þorkell Nordal (ÞN) og Örnólfur Eldon (ÖE). Þau er ekki ritað upp í heild samkvæmt segulbandi - blessunarlega - heldur eingöngu þeir þættir er tengjast rannsókn þeirra félaga og ég legg nú blessun á. Nóg samt! Þeir bræður skellihlógu á réttum stöðum - líkt og við Þorkell í áratugi - Þorkell var mikill brandarakall. En hlátur LHÍ drengja er ekki færður til bókar - enda þetta alvarlegt háskólaverkefni. Þeir þrír, Steinar Logi, Þorkell og Örnólfur - eru einstaklega skemmtilegir ungir menn. Hér að neðan er afrakstur starfa þeirra um Þorkel - ásamt síðari vangaveltum mínum. Kannski birtist annað eins um Jón Nordal? Einu sinni var sonur minn að skrifa vísindalega ritgerð um Einar Má Guðmundsson. Á ég ekki bara að hringja í hann fyrir þig? Það var gert. Ekkert sjálfsagðara sagði Einar Már (við erum vinir). Aldrei fékk ég að sjá hvað kom út úr því djúpa viðtali. Eftirfarandi samtal var líka ójafn leikur. Þrír sprenglærðir gæðingar gengu í skrokk á gamalmenni og vildu vita allt. Gráar sellur mínar fengu taugaáfall og voru lengi að jafna sig eftir þessa innrás - enda hefur ekki nokkur maður sýnt áhuga á Þorkatli Sigurbjörnssyni í mínu persónulegu eyru - hvorki fyrr né síðar. Eða eins og Jón Nordal sagði við mig af öðru tilefni: Það er merkilegt hve fljótt fennir í spor mikilhæfra manna á Íslandi. Ég man þetta orðrétt - og allt annað sem Nordal hefur sagt við mig frá 1964+. Þá sjaldan Jón talar hlustar maður! Sama á við um Þorkel. Og maður á að segja satt. Ég er viss um að mig hefði skort kjark til að skrifa svona grein um Þorkel, vin og sálufélaga. Þrír ungir menn kveiktu ómótstæðilega glóð í mér og áttu í erfiðleikum með að halda mér á beinni braut. Fyrir þetta allt er ég þeim einstaklega þakklátur - svo ekki sé meira sagt. Vona að þetta komi að gagni. Blessuð sé minning Þorkels. Eftirfarandi er byggt á fyrirspurnum háskólanema - með viðbótum sem hafa leitað á mig miðsumars. Þetta er allt þeim að kenna. Steinar Logi, þorkell og Örnólfur opnuðu flóðgátt. Rétt að taka fram að allt sem hér er sagt er ritað eftir minni, þar á meðal allt sem sagt er um tónverk Þorkels - stórt og smátt. Þau syngja í hug mér. Það leiðréttist er leiðrétta þarf - er fram líða stundir.

Sjá áframhald greinar hér